பேலியோ உணவுமுறையால் சிறுநீரக பாதிப்பு வருமா? டாக்டர் அருண்குமார்

Dr. Arunkumar, MBBS, MD(Pediatrics),
Erode.

பேலியோ உணவுமுறை என்றதுமே, கிட்னி சட்னி ஆகும், சிறுநீரகம் சின்னாபின்னமாகும் போன்ற விமர்சனங்கள் மருத்துவர்களிடமும் சில பொது மக்களிடமும் எழுவது சகஜமாகிவிட்டது. ஊடகங்களும் இது போன்ற ஆதரமில்லாத தவறான ஆனால் சுவாரசியமான பரபரப்பு மிக்க செய்திகளை வெளியிடுவதில் அதிக கவனம் செலுத்துகின்றன.

இதன் பின்னணி என்ன?

பேலியோ உணவுமுறை என்றதும் அனைவருக்கும் நினைவுக்கு வருவது கறியும் கோழியும் முட்டையும். இறைச்சி வகைகளில் புரதம்(protein) அதிகம் இருப்பதால் சில வருடங்களில் சிறுநீரக பாதிப்பு உண்டாகும் எனும் தவறான கருத்து நிலவுகிறது.

புரதம் என்றால் என்ன?

நம் உடலின் கட்டுமானத்திற்கு உதவும் building blocks தான் புரதம்.

Cytoskeleton எனப்படும் நமது செல்களின் அஸ்திவாரம் புரதம்.

actin, myosin எனப்படும் புரதங்கள் தான் நம் தசைகளின் முதுகெலும்பு.

நாம் உண்ணும் உணவை செரிமானம் ஆக்க உதவும் அனைத்து என்சைம்களும் புரதம் தான்.

இன்சுலின், பிட்யூட்டரி போன்ற அதிமுக்கிய ஹார்மோன்கள் புரதம் தான்.

நோய் எதிர்ப்பு சக்தி என்று கூறுகிறோமே, அந்த இம்யூனோக்ளோபுளின் புரதம் தான்.

இது மட்டுமில்லாமல் உடலில் நடைபெறும் பல்லாயிரக்கணக்கான உயிர்வேதியியல் செயல்பாடுகளுக்கும் உதவும் பெரும்பாலான என்சைம்கள் புரதம் தான்.

சுருக்கமாகச் சொன்னால் புரதம் தான் நம் உடலின் உயிர்நாடி.

எவ்வளவு புரதம் தேவை?

ஒரு சராசரி மனிதனுக்கு அவனது உடல் எடையை போல 0.7 மடங்கு கிராம் புரதம் தேவை. அதாவது அவனது உடல் எடை 80 கிலோ இருந்தால், அவனுக்கு 56 கிராம் புரதம் தேவை. பிரசவமாக இருக்கும் பெண்கள், தாய்ப்பால் ஊட்டும் பெண்கள், குழந்தைகளுக்கு(கிலோவுக்கு 1.5 கிராம் வரை) புரதம் இன்னும் அதிகம் தேவைப்படும். இதில் குறிப்பாக, இந்தியா போன்று பெரும்பாலும் சைவ உணவுகளில் இருந்து புரதம் எடுத்தால், அதன் குறைந்த தரம் காரணமாக இன்னும் அதிக புரதம்(ஒரு கிலோ எடைக்கு 1 கிராம்) தேவை.

இங்கு குறிப்பிடப்பட்டுள்ள அளவு குறைந்தபட்ச அளவு மட்டுமே. இதற்கு குறைந்து புரதம் எடுத்தால் தளர்வு, தசை இழப்பு, உடல் சோர்வு மற்றும் பல கோளாறுகள் உடலில் ஏற்படும்.

மிருகங்களின் புரதம் உடலுக்கு கெடுதலா?

இது தான் மிகப்பெரிய காமெடி.

புரதங்களின் மூலக்கூறுகள் அமினோ ஆசிட் எனப்படும். 20 வகை அமினோ ஆசிட்கள் மூலம் பல்லாயிரக்கணக்கான புரதங்கள் உடலில் தயார் செய்ய படுகின்றன. இதில் 9 வகை அமினோ ஆசிட்கள் உணவில் இருந்து மட்டும் தான் உடலுக்கு கிடைக்க செய்ய வேண்டும். இவை essential amino acids என்றழைக்கப்படும். இவை அனைத்தும் ஒரு சேர கிடைப்பது முட்டை மற்றும் மிருக புரதங்களில் மட்டும் தான். அரிசியிலோ பருப்பிலோ சுண்டலிலோ அனைத்து essential அமினோ ஆசிட்கள் கிட்டுவதில்லை. எனவே தான் பருப்பு சுண்டல் வகைகளை உணவியல் நிபுணர்கள் poor man’s meat (ஏழையின் இறைச்சி) என்றழைப்பர். முட்டை புரதத்தை reference protein என்றழைப்பர். அதாவது மற்ற எல்லா உணவு வகைகளிலும் எவ்வளவு புரதம் இருக்கிறது, அதன் தரம் என்ன என்பதை முட்டையுடன் ஒப்பிட்டுத் தான் விளக்குவார்கள். நாம் பள்ளி செல்லும்போது எல்லா பாடத்திலும் ஒருவன் முதல் ரேங்க் வாங்குவானே, எல்லாரும் அவனை மாதிரி படிக்க வேண்டும் என்பார்களே, அவனைப் போல.

பேலியோ அதிக புரதம் எடுக்கும் உணவுமுறையா?

இது பொதுவாக மக்களிடமும் மருத்துவர்களிடமும் நிலவும் தவறான கருத்து.
பேலியோ என்பது
– குறைந்த மாவுச்சத்து (carbohydrate)
– அதிக கொழுப்பு (fat)
– தேவையான அளவு புரதம் (protein)
எடுக்கும் உணவுமுறை.

பொதுவாக இந்தியர்கள் உண்ணும் உணவில் இருப்பது 30-40 கிராம் புரதங்களே. அதுவும் தரம் குறைந்த தானிய புரதங்கள்.

பேலியோ உணவில் கிட்டத்தட்ட 80 முதல் 100 கிராம் வரை உயரிய மிருக புரதங்கள் கிடைக்கும். அனைத்து essential அமினோ ஆசிட்களும் கிட்டும். உடல் தேவையான அளவு புரதங்களைப் பெற்று செழிப்புடன் விளங்கும்.

புரதம் நல்லது சரி, அதிகபட்சம் எவ்வளவு எடுக்கலாம்?

ஒரு சராசரி மனிதன் ஒரு கிலோவுக்கு 2.5 கிராம் என்கிற அளவு வரை புரதங்கள் எடுக்கலாம். எந்த பிரச்னையும் இல்லை. அதாவது ஒரு 80 கிலோ எடையுள்ள மனிதன் தினசரி 200 கிராம் வரை எடுக்கலாம். எந்த பாதிப்பும் ஏற்படாது. இது ஆராய்ச்சிபூர்வமாக நிரூபிக்கப்பட்ட தகவல். ஆனால் நம் உடலால் அதிகபட்சம் ஜீரணம் செய்யக்கூடியது கிட்டத்தட்ட 375 கிராம் புரதம். (Theoretical maximum)
http://www.ncbi.nlm.nih.gov/pubmed/16779921

கவனிக்கவும்: பேலியோவில் பரிந்துரைப்பது 80-100 கிராம் புரதங்களே.

சரி, 56 கிராம் குறைந்தபட்ச தேவை எனும்போது, 150 கிராம் எடுத்தால் என்ன ஆகும்?

1. பாடி பில்டிங்கில், விளையாட்டு துறையில் உள்ளோர், அதிக புரதம் எடுக்கும்போது அந்த புரதங்கள் actin மற்றும் myosin ஆக மாறி, தசைகளை மெருகேற்றும்.

2. குறைந்த கார்போஹைட்ரேட் உணவுமுறையை பின்பற்றும் ஒரு சராசரி மனிதர் அதிக புரதங்கள் எடுத்தால், மிச்ச புரதங்கள், gluconeogenesis எனும் செயல் மூலம், உடலில் குளுக்கோஸ் ஆக மாறி, மூளை, சிவப்பு அணுக்கள், சிறுநீரகம் போன்ற உறுப்புகளுக்கு சக்தி தரும்.

3. மிச்சக் கழிவுகள் யூரியாவாக மாறி, சிறுநீரகத்தால் வெளியேற்றப்படும்.

இந்த கடைசி பாயிண்டை தான் மக்கள் பிடித்துக்கொண்டு பேலியோவைத் தூற்றிய வண்ணம் உள்ளனர்.

உண்மையில் அதிக புரதம் எடுத்தால் சிறுநீரகம் பாதிக்கப்படுமா?

– ஆராய்ச்சிகளில், ஏற்கனவே சிறுநீரகம் செயலிழப்பு (renal failure) உள்ள மக்களுக்கு அளவுக்கு மீறிய புரதம் கொடுத்தால் தொந்தரவு அதிகமாகும் என்று நிரூபிக்கப்பட்டுள்ளது.

– ஆனால், எந்த தொந்தரவும் இல்லாத, சிறுநீரகம் நன்றாக செயல்படும் மக்களுக்கு அதிக புரதம் கொடுத்தால் அவர்களுக்கு சிறுநீரக தொந்தரவு வரும் என்று கூறுவது முட்டாள்தனம். அதற்கு எந்த ஒரு ஆராய்ச்சி அடிப்படையும் இல்லை.

– சிறுநீரகத்தின் முக்கிய வேலைகளுள் ஒன்று புரதம் ஜீரணமாகும்போது உருவாகும் nitrogenous கழிவுகளை வெளியேற்றுவதுதான். அதனால் தான் இந்த சந்தேகங்கள் வருகின்றன.

– உடலில் புரதங்களை ஜீரணம் செய்ய ஒரு எல்லை இருக்கிறது. பல ஆராய்ச்சிகளின் மூலம், அது மொத்த உணவின் 35 சதவீதம் என்று கண்டுபிடிக்கப்பட்டுள்ளது. ஆனால், அத்தனை புரதம் உண்பது சாத்தியம் அல்ல. அதனைக் கட்டுப்படுத்த மூளையில் பல்வேறு செயல்பாடுகள் உள்ளன.
http://www.ncbi.nlm.nih.gov/pubmed/22319049

– அளவுக்கு விஞ்சிய புரதங்கள் எடுக்கும்போது சிறுநீரகத்தில் சில மாற்றங்கள் நிகழ்வது சில ஆராய்ச்சிகளில் கண்டுபிடிக்கப்பட்டுள்ளது.
http://www.sciencedirect.com/…/art…/pii/B9780123919342000138
http://www.ncbi.nlm.nih.gov/pubmed/10578207
http://www.ncbi.nlm.nih.gov/pmc/articles/PMC3602135/

– இந்த மாற்றங்கள் யாதெனில்
*glomerular filtration rate (GFR) எனப்படும் சிறுநீரகத்தின் வடிகட்டும் வேகம் அதிகம் ஆகிறது.
*glomeruli எனப்படும் சிறுநீரகத்தின் அடிப்படை யூனிட்கள் அளவில் பெரியதாகின்றன.

– இந்த மாற்றங்களை hyperfiltration என்பார்கள். இவற்றை, ஆரோக்கியமான சிறுநீரகத்தின் adaptive changes (தேவைக்கேற்றார் போல் செயல்திறனை மாற்றி அமைத்து கொள்ளும் தன்மை) என்பார்கள்.
http://www.ncbi.nlm.nih.gov/pmc/articles/PMC1262767/

அதாவது, மரம் வெட்டுப்பவனை விட ஓவியனுக்கு கை நேர்த்தி அதிகம் உள்ளதே, அது போல.

– இத்தகைய adaptive changes பிரசவமாக இருப்பவர்க்கும், ஒரு சிறுநீரகத்தை தானம் செய்தவருக்கும் சாதாரணமாக நடப்பதுண்டு. உதாரணத்திற்கு, ஒரு சிறுநீரகத்தை தானம் செய்தவருக்கு, இன்னொரு சிறுநீரகம் கொஞ்சம் அதிக வேலை செய்யும். GFR அதிகமாக இருக்கும். ஆனால், ஒரு போதும் அது பாதிப்படையாது.
http://journals.plos.org/plosone/article

இந்த மிக உயரிய systematic review ஆராய்ச்சியில், அதிக புரதம் எடுப்பது gfr, urea, uric acid போன்றவற்றை சிறிது அதிகம் அடையச் செய்தாலும், அது சிறுநீரகத்தின் தேவைக்கேற்றார் போல் செயல்திறனை மாற்றி அமைத்து கொள்ளும் தன்மை தான். இதற்கு எந்த முக்கியத்துவமும் கொடுக்க தேவையில்லை என்று முடிவுரை கூறியுள்ளார்கள்.
http://www.ncbi.nlm.nih.gov/pmc/articles/PMC3386674/

இந்த ஆராய்ச்சியில் அத்தகைய சிறு மாற்றங்களும் அதிக புரதம் எடுக்கும் யாருக்கும் நிகழவில்லை என்று கண்டுபிடித்துள்ளார்கள்.

http://www.sciencedirect.com/…/art…/pii/B9780123919342000138

இந்த ஆராய்ச்சிக்கட்டுரையில், அதிக புரதம் எடுப்பது பற்றிய எல்லா ஆராய்ச்சிகளையும் ஒப்பீடு செய்து இறுதியாக ஒரு முடிவை எட்டியுள்ளார்கள். அதாவது, மேலே குறிப்பிட்டுள்ளது போல சிறு சிறு மாற்றங்கள் புரதம் அதிகம் எடுக்கும்போது நடந்தாலும், அவை சாதாரண adaptive மாற்றங்களே. அது பற்றி எந்த ஒரு தயக்கமும் தேவை இல்லை. ஆனால், நாம் பொதுவாக எடுக்கும் அதிக மாவுச்சத்து உணவுகளே, நீரிழிவு நோய் போன்ற கொடிய நோய்களை வரவழைத்து, diabetic nephropathy எனும் நீரிழிவினால் ஏற்படும் சிறுநீரக செயழிலப்பை அதிகப்படுத்தி, வருடம் ஒன்றிற்கு பல்லாயிரக்கணக்கான மரணங்களை நிகழ்த்துகின்றன என்கிறார்கள்.

இது மட்டும் இல்லாமல், பேலியோ போன்றதொரு குறைந்த மாவுச்சத்து, அதிக கொழுப்பு, தேவையான அளவு நல்ல புரதம் எடுக்கும் உணவுமுறையில், diabetic nephropathy எனும் நீரிழிவினால் ஏற்படும் சிறுநீரக செயழிலப்பு ஆரம்ப கட்டத்தில் இருந்தால், பூர்த்தி குணமடையவும் நிறைய வாய்ப்புகள் இருப்பதாக ஆரம்பகட்ட ஆராய்ச்சி முடிவுகள் தெரிவிக்கின்றன.
http://journals.plos.org/plosone/article
http://nutritionandmetabolism.biomedcentral.com/…/1743-7075…

பின் குறிப்பு: சிறுநீரக கோளாறுகளுக்கு டயாலிசிஸ் மற்றும் சிறுநீரக மாற்று அறுவை சிகிச்சை தேவைப்படும் நபர்களில் கிட்டத்தட்ட 60 முதல் 70 சதவீதத்திற்கு மூல காரணம் diabetes(நீரிழிவு நோய்) மற்றும் hypertension(உயர் இரத்த அழுத்தம்). இவற்றை குணமாக்க தற்போது எந்த ஒரு மருத்துவமும் இல்லை என்பதை நினைவில் கொள்ளவும்.

மறுபடியும் முதல் கேள்விக்கே வருவோம்.

பேலியோ உணவுமுறையால் சிறுநீரக பாதிப்பு வருமா?

கதைச்சுருக்கம்:

1. பேலியோ உணவு முறையால் சிறுநீரக பாதிப்பு வரும் என்று நினைப்பது அரை வேற்காட்டுத்தனமான ஆதாரம் அடிப்படைகளற்ற குற்றச்சாட்டு.

2. வேண்டுமானால், பேலியோ உணவுமுறை உங்களை பல எதிர்கால சிறுநீரக பாதிப்புகளில் இருந்து காப்பாற்றும். உங்களுக்கு நீரிழிவு நோய் மற்றும் உயர் அழுத்தத்தில் இருந்து விடுதலை அளிப்பதன் மூலம் உங்கள் சிறுநீரகங்களை செயலிழப்பில் இருந்தும், உங்களை டயாலிசிஸ் இல் இருந்தும், மாற்று சிறுநீரகங்களுக்கு காத்துக் கிடக்கும் கொடிய நிலைமையில் இருந்தும் காப்பாற்றும்.
எனவே, இல்லாத ஒரு பிரச்சனைக்கு பயந்து மாவுச்சத்து உணவு உண்டு, உங்களின் சிறுநீரகங்களை நீரிழிவு நோய்க்கும் உயர் இரத்த அழுத்தத்திற்கும் பலி கொடுக்க வேண்டுமா?

அல்லது பேலியோ உணவு முறை பின்பற்றி, உங்கள் சிறுநீரகங்களை பொன் போல பாதுகாத்துக்கொள்ள வேண்டுமா?

நீங்களே முடிவு செய்து கொள்ளுங்கள்!!

Follow us on Social Media